執行李 怕帶漏嘢？一個齊全嘅行李 Check List 幫到你！
每次出發去旅行，你會用幾多時間 執行李？
一個星期？幾日？一日？
有冇試過執漏咗某啲重要嘢，搞到唔知點算好？
A仔我多數都係臨飛之前先會執行李，點解？
一來，有好多物品，例如衣物、化妝品、充電器等等，其實每日都需要用，如果一早放晒入行李箱就會變得好唔方便～
二來，我執行李通常只需要30-60分鐘內就搞掂，就算磨磨吓慢吞吞都頂多2個鐘，所以飛之前先執，完全無有怕！
三來，我有執行李 check list 喺手，每次對住個 check list 執，絕對唔會漏！
今次我就分享吓我執行李嘅方法，絕對係快、狠、準！
而 Mr. W 睇過我執行李之後，都驚訝點解我可以咁快同冇帶漏嘢，兼夾 pack 好埋佢件行李添！
— A仔第一次去日本，一個人就帶咗 60kg 返香港嘅壯觀情況… 😯
執行李 四大要訣
1. 你要有一個行李 check list 喺手，未有就即刻下載A仔行李 Check List
**A仔解釋：有行李 check list，先可以真正做到快、狠、準！
2. 你必須喺執行李前，洗乾淨晒已著過嘅衣物
**A仔解釋：有乾淨嘅衣物，你先容易揀到陪你去旅行嘅衫！同埋都去旅行啦，唔洗晒啲著過嘅衫會成間屋變臭臭的喔！～
3. 你必須預先睇一次行李 check list，睇吓有冇啲物品你係要出街買定先
**A仔解釋：臨出門口先發現冇某樣物品，真係唔知突然邊度有得買，或者根本冇時間買！
所以一定要預先買定放喺屋企，咁隨時執行李都洗乜驚呀！
4. Check List 內只顯示最基本旅行物品，你當然可以因應自己旅行的需要或個人習慣而進行修改！
**A仔解釋：基本物品即是一般都會帶去旅行用的東西，如果本身你個人習慣有唔同、或者原來你去外國踩單車嘅、帶埋小朋友一齊去，咁你嘅 check list 就會唔一樣㗎啦！
做好晒以上四大要訣，執行李時都得心應手啲呀！ 😉
下次分享我會用咩方法執行李，令到我嘅行李箱 keep 住整齊兼方便取用各物品！
